ni li sitelen sin lon musi Pokémon. ken la mi pana sin lili e ni.
mi jan Jusume. mi tan ma tomo Ijoki lon ma Isu. mi lon ma tomo Suto lon ma Kala.
mi kute e nimi Kituli Topi lon sitelen lape mi. nimi Kituli Topi li seme? mi kute e ni:
“jan Sitolon la ijo ni li lon: ilo la ijo li ike. utala pi monsuta Pokémon ni lon utala suli Kituli Topi li lon sin lon tenpo ni: ijo li pona e ijo lon ilo pi jan Sitolon.”
nimi Kituli Topi li toki Kala ala, li toki Pateja ala, li toki Kalose ala, li toki Wema ala. ken la, nimi ni li jo ala e kon.
mi toki e ni tawa monsuta Sasin: “sina sona ala sona e utala suli Kituli Topi?”
monsuta Sasin li mu.
(monsuta Sasin li monsuta Pokémon mi; nimi Sasin li kama tan jan Sasin, tan sitelen tawa lili pi kalama musi. monsuta Sasin li lili, li sama lili monsuta Wanpasi. mi sona e ni: wawa ona li suwi. taso, lipu sona pi monsuta Pokémon lon ma Kala en lipu sona pi monsuta Pokémon lon ma Isu li sona ala e ni: monsuta Sasin li monsuta Pokémon seme?)
monsuta Anatasija li mu.
(monsuta Anatasija li monsuta Pokémon ante mi. tenpo suno wan la mi lon ma tomo Mijale. mi kama lon tomo moku li lukin e ona. jan mute li toki e ni: “jan seme li jo e monsuta Ulapepe ni?” jan ala li jo e ona. tan ni la mi kama jo e ona. jan wan ante li wile e ni: mi pana e nimi Anatasija tawa ona.)
mi o kama sin lon utala sona. mi o kama lon tomo sona suli. tenpo lili la mi sitelen insa e ni: mi kama lon ale ante li lukin e ilo nanpa pi wawa mute e tomo lawa pi suli mute e… e…!
taso, tomo sona suli la, mi o toki insa ala lon ale ante, lon utala suli Kituli Topi. mi o pali. mi o kama sona. taso, mi o kama sona e seme?
tomo sona wan la, mi kama sona e toki Pateja. tomo sona ante la, mi kama sona e toki Kalose. tomo sona suli la, mi kama sona e toki Wema anu seme…? taso, tenpo ni la, tomo sona suli li pana ala e sona lon toki Wema anu seme…?
toki Wema la mu suli ante li lon. mu suli ante ni li mu Ы. mi pilin e ni: mi ken ala mu Ы pona. taso mi wile mu ni pona a!
“jan Jusume o!”
“toki?!??!?! seme??!?!??!”
“moku li lon a!”
“a————.”